Motorollerda barcha mexanizmlar panel bilan yopilgan bo‘ladi, kuch uzatish agregati esa blok-motor-g‘ildirak sxemasi asosida qurilgan. Tashqi qoplama panellari haydovchini loy-tuproqdan va qarshi esayotgan shamoldan ham himoya qiladi.

Motoroller yo‘l harakatining o‘ziga xos “mikroorganizmi” hisoblanadi — u oddiy konstruksiyaga ega, g‘ildirak disklari kichik, butun korpusi plastik qoplama bilan yopilgan va asosan shaharda kundalik harakatlanish uchun mo‘ljallangan. Skuterlar zarur bo‘lgan barcha yorug‘lik uskunalari bilan jihozlangan bo‘ladi. Odatda old tomonda diskli tormoz (125–150 sm³ dvigatelli modellarda orqa tormoz ham diskli) mavjud. Ular shaharda 60–90 km/soat tezlikda harakatlanish uchun mo‘ljallangan.

Shu turdagi motorollerlar qatoriga “Lochin” modeli ham kiradi. “Lochin” motorolleri oddiy va ixcham tuzilishga ega bo‘lib, asosan shahar ichida harakatlanish uchun mo‘ljallangan. Uning g‘ildiraklari kichik diametrli, korpusi plastik panellar bilan yopilgan va yonilg‘i sarfi iqtisodiy hisoblanadi. Ushbu model kundalik qatnov uchun qulayligi, boshqarishning osonligi va manevr qilish imkoniyati bilan ajralib turadi.

Yevropa Ittifoqida ishlab chiqaruvchilar 50 sm³ sinfidagi motorollerlarning maksimal tezligini 45 km/soat bilan ataylab cheklashadi, Yaponiyada esa bu ko‘rsatkich 30–35 km/soat atrofida. Motoroller o‘zining tejamkorligi va manevr qilish qulayligi sababli avtomobillar juda ko‘p bo‘lgan yirik shahar va megapolislarda mashhur transport vositasiga aylangan.

Ayniqsa dvigatel hajmi 50 sm³ gacha bo‘lgan motorollerlar juda mashhur bo‘lib, ko‘plab mamlakatlarda ular mopedlarga tenglashtiriladi. Ayrim davlatlarda bunday transport vositalarini boshqarish uchun haydovchilik guvohnomasi talab qilinmasligi mumkin va ularni 16 yoshdan boshqarishga ruxsat beriladi.

Shahar tipidagi motorollerlar sifatli asfalt qoplamali yo‘llarda harakatlanish uchun mo‘ljallangan. Chuqur, notekis yoki tuproq yo‘llarda uzoq masofaga yurish noqulay bo‘lishi mumkin. Buning sababi — g‘ildirak diametrining kichikligi va amortizatsiya tizimi bunday yo‘llarga mos emasligi.

Motorollerlar uchun eng qulay yo‘l — sifatli asfalt yo‘llar. Shu bilan birga, tuproq yo‘llarda yurish uchun kattaroq g‘ildirakli motorollerlar ham ishlab chiqariladi. Bundan tashqari, keng shinali va yo‘ltanlamas protektorli yo‘ltanlamas motorollerlar ham mavjud.