Замонавий дунё ривожланиб бораётгани сари – энергия манбаларига эҳтиёж ҳам ошиб бормоқда. Тинимсиз ривожланиш туфайли, охирги 15 йил давомида юртимизда электр энергиясига бўлган эҳтиёж 23 фоизга ошди. Шу сабабли, табиий энергия манбаларини сақлаб қолиш учун, муқобил энергия манбаларидан фойдаланиш зарурияти йилдан-йилга кучаймоқда. Ҳозирда сувни иситиш ва бошқа эҳтиёжлар учун энг фаол қўлланиладиган муқобил энергия манбаи - қуёш энергияси ҳисобланади.

Юртимизда табиий ресурсларни тежамкорлик билан қўллаш мақсадида  2017 йил 8 ноябрь куни Ўзбекистон Республикаси Президенти Шавкат Мирзиёев “Энергия ресурсларидан оқилона фойдаланишни таъминлаш чора-тадбирлари тўғрисида” ги қарорини қабул қилди. Ушбу қарорга биноан 2022 йил 1 январдан бошлаб давлат органлари ва ташкилотлари ўз балансида бўлган бино ва иншоотларда иссиқ сув таъминоти учун фақат сертификатланган қуёш сув иситгич қурилмаларини ишлатишлари шарт.