Маккажўхори дунёда энг кўп етиштириладиган ва тарқалган донли экинлардан биридир. У ем-хашак, озиқ-овқат ва техникавий экин. Озиқ-овқат мақсадларида дунё бўйича етиштириладиган маккажўхори донининг 20 %, техникавий 15-20 %, қолган қисми, яъни учдан икки қисми ем-хашак мақсадларида ишлатилади.

Маккажўхорининг дони, яшил массаси, силоси ва сўтаси, у ажойиб озиқа. 1 кг донида 1,34 озиқа бирлиги ва 78 г ҳазмланадиган протеин бор. Омихта ем тайёрлашда маккажўхори қимматли компонент ҳисобланади. Ун­инг донидаги асосий оқсил зеинда триптофан, лизин алмаштирилмайдиган аминокислоталари кам.

Ўзбекистоннинг суғориладиган ерларда кузги бошоқли дон экинларидан кейин маккажўхорини дон, силос ва кўк массаси учун анғиз экини сифатида экиб юқори ҳосил олиш имконияти бор.

Ўзбекистонда экиладиган маккажўхорининг асосий навлари:

• ЎзРОС-кремнистая — маҳаллий поплуяциялардан танлаш йўли билан яратилган. Дон ва силос учун Самарқанд, Жиззах, Навоий, Сирдарё, Тошкент, Хоразм вилоятларида экиш учун Давлат реестрига киритилган. Дони оқ, ҳосили 68,3-69,7 с/ га тенг. 1000 та доннинг вазни 259,4-273,5 г. Кечпишар. Ўсув даври 135-137 кунни ташкил этади. Оқсил 8,8-9,8 %, крахмал 76,3-74,7 %. Қоракуя касаллиги билан ўртача зарарланади.
• Молдавский 425-МВ — Молдавия жўхори ва маккажўхори илмий текшириш институтида яратилган. Республика бўйича экиш учун Давлат реестрига киритилган. Тишсимон. Дони сариқ, ҳосили 108,7 с/га тенг бўлади. Дон чиқиши 82-86 %, 1000 дон вазни 340-352 г. Ўсув даври 104-137 кунни ташкил этади. Пуфакли қоракуя ва сўта бактериози билан ўртача зарарланади.
• Ўзбекистон – 306 МВ — такрорий экиш учун мўлжалланган. Давлат реестрига киритилган. 1000 дон вазни 340-420 г, ўртапишар. Ўсув даври 86-103 кунни ташкил этади. Пуфакли қоракуя билан зарарла­нади, кўсак қурти ва тунлам билан кам зарарланади.

Маккажўхори кузги буғдой, кузги арпа, картошка, полиз экинлари учун яхши ўтмишдош. Уни сурункасига бир далада 4-5 йил, қоракуя бўлмайдиган майдонларда 10-15 йил ўстириш мумкин. Бу экинни ферма олди алмашлаб экишларда, фермага яқин майдонларга экиш, ор­ганик ўғитларни кўпроқ солишга, ҳосилни йиғиштириш, сақлаш, ташиш ишларини, харажатларини камайтиришга имкон беради.