Terak (Populus L.) — toldoshlar oilasiga mansub daraxtlar turkumi. Ayrim maʼlumotlarga koʻra, 100 dan ortiq turi mavjyd. 30 ga yaqin turi Yevrosiyo, Shimoliy Amerika va Shimoliy Afrikada Tarkalgan. Oʻzbekistonda terakning koʻkyaproqli yoki zangori bargli (P. pruinosa Schrenk), furot teragi (P. euphratica Olid.), mirzaterak (P. nigra L.), afgʻon teragi (R. afghanica), oq terak (P. alba), Baxofen teragi yoki koʻkterak (P.bachofenu Wierzb.) turlari oʻsadi. Mirzaterak, koʻkterak, oqterak turlari koʻp ekiladi. Teraklarning baʼzi turlari boʻyi 30— 45 (baʼzan 60) m gacha, diametri 1,5 (ayrim daraxtlariniki 3 m) gacha yetadi. Teraklar tanasi tik, shox-shabbasi tuxumsimon, piramidasimon, keng ovalsimon boʻladi. Barglari bandli, ketma-ket, barg plastinkasi yaxlit yoki kertikli, nashtarsimon. Kuchalasi silindrsimon, boshoqsimon toʻpgul, gullagandan keyin toʻkiladi. Guli bir jinsli, ikki uyli. Aksariyati barg yozishdan oldin, baʼzilari barg yozgandan keyin gullaydi. Urugʻi koʻsakcha, shamol va suv yordamida tarqaladi. Nam tuproqda tez unib chiqadi. Terak issiqsevar, yorugʻsevar, sovuqqa bardoshli (masalan, mirzaterak) oʻsimlik. Sernam va unumdor tuproqlarda tez yetiladi, lekin baʼzilari shoʻrxok tuproqni xush koʻrmaydi. Terak qisqa umrli (25—30 yoshgacha yaxshi rivojlanadi) daraxt boʻlsa ham 150—200 yil umr koʻradiganlari ham (mirzaterak va oqterakning ayrim daraxtlari) bor.