Тавсиф
Ерёнғоқ (Хитой ёнғоғи) – қимматли мойли ва озиқ-овқат ўсимлигидир. Бугунги кунда дунёда аҳолининг озиқ-овқат маҳсулотларига бўлган эҳтиёжини қондиришда мойли экинлар, жумладан, ерёнғоқ (Arachis hypogaea L.) ҳосилдорлигини ва уруғ сифатини ошириш муҳим аҳамият касб этади. Жаҳон миқёсида 117 та мамлакатда ерёнғоқ экилади ва экин майдони 27,7 миллион гектарни ташкил этиб, ялпи ҳосил 43,9 миллион тоннани ташкил этади. Ўртача ҳар гектар майдондан 1,6 тонна ҳосил етиштирилади. Умумий етиштирилган ҳосилнинг 68% Осиё ва 25% Африка қитъалари ҳиссасига тўғри келади. 2018 йилги жаҳон статистик маълумотларида келтирилишича, Ўзбекистон ерёнғоқ етиштириш бўйича дунёда 51-ўринни, ҳосилдорлик бўйича эса 1-ўринни эгаллаган. Етиштириладиган энг кўп маҳсулот Ҳиндистон, Хитой ва Америка Қўшма Штатларининг улушига тўғри келиб, айнан шу мамлакатларда етиштирилган маҳсулотнинг 60-80% қайта ишланади. Дунё бўйича энг юқори ҳосилдорлик Хитой (2,5-3,0 т/га) ва Америка Қўшма Штатларида (3,0-4,0 т/га) қайд этилган. Республикамизда бу кўрсаткич ўртача такрорий экин сифатида парваришланганда 1,5-1,8 т/га ни, асосий экин сифатида илғор фермер хўжаликларида етиштирилганда 3,5-4,0 т/га ни ташкил қилади.