Uzumchilik mamlakatimiz agrar sohasining qadimiy serdaromad tarmoqdardan biridir. Uzumchilik o‘simlikshunoslik sohasining bir bo‘limi sifatida uzum yetishtirish bilan shug‘ullansa, fan sifatida tokdan muttasil mo‘l va yuqori sifatli hosil yetishtirish uchun uning o‘sish rivojlanish va hosil berishni boshqarishning turli usullarini ilmiy nazariy va ilg‘or tajribalar asosida ishlab chiqadi hamda qishloq xo‘jaligi oliygohlarida o‘quv fani sifatida ularni o‘rganadi. Markaziy Osiyo o‘lkasida xususan, O‘zbekiston Respublikasining qulay tabiiy - iqlim sharoitida uzumning turli muddatlarda, ya’ni eng erta va eng kech pishadigan navlarini yetishtirish imkoniyati mavjuddir.           Tok — qimmatbaho subtropik o‘simlik bo‘lib, inson umrini uzaytirishga juda katta hissa qo‘shuvchi mahsulot turlaridan biri bo‘lib, uning mevasi o‘zining parhezlik va oziqaviy tarkibi jihatidan inson organizmi uchun eng zarur mahsulot sanalanadi. Pishib yetilgan uzum mevasi tarkibida, ayniqsa kishmish navlarida 2830%gacha odam organizmi tomonidan tez o‘zlashtiriladigan qandlar—glyukoza, fruktoza va saxaroza bor bo‘lib, qon tarkibini yaxshilanishida va almashlab turilishida muhim ahamiyat kasb etadi.  Yangi uzilgan uzum mevasi tarkibida inson salomatligi uchun zarur bo‘lgan olma, vino, limon, qahrabo, otquloq, chumoli va boshqa bir qancha organik kislotalar hamda kaliy, kalsiy, fosfor, natriy kabi mineral tuzlar, meva po‘sti tarkibida rang beruvchi moddalar (pigmentlar), dubil moddalari bor.