Қадимий тасвирий ва рамзий безакли матолар нақшинкор-безакли матоларга ўрнини бўшатиб берган, турфа рангли йўл-йўл, ўсимликсимон, ҳандасавий ва мавзули нақшлар устуворлик касб этган. Ўтмишда Бухоро, Самарқанд, Марғилон ва Қўқонда ишлаб чиқарилган ипак матолар- шойилардан аёллар либосларида кўпроқ фойдаланган. Матолар орасида буялмаган қўлда тўқилган матолар халқ орасида кенг тарқалган. Ўрта Осиё халқларининг кийим-кечаклари кўп асрлик тарихга эга бўлиб, ҳар бир элат ва этник гуруҳларнинг ўзига хос хусусиятли бош-оёқ кийимлари мавжудлиги, уларнинг тарихий тақдири, маданияти узоқ давр ўзаро яқин бўлганлигидан далолат беради.