ҚЎЗИҚОРИН — дискомицетлар уруғи аскомицетлар синфига мансуб замбуруғлар туркуми. Апотецитлари йирик, бал. 6—15 см, кенглиги 1,5—5 см, тик ва этдор, пояча ва қалпоқчага бўлинган. Поячаси цилиндрсимон, йўғонлиги 2—3 см. Қўнғир тусли қалпоқчаси поячага ёпишган, конуссимон сирти уячали. Аскалари цилиндрик, узун (350 мкм гача). Споралари бир ҳужайрали. Қўзиқориннинг 6 тури бор. Шим. ярим шарнинг мўътадил минтақаларида, Австралия аралаш ва игнабаргли ўрмонларининг яланг жойларида, айниқса, ёнғин кетган қисмида, ўрмон четлари ва тоғларда тарқалган. Тупроқ сапрофити. Эрта баҳорда учрайди. Пишириб ейилади. Ўзбекистонда чўл Қ. и ўсади.