ФОСФОРЛИ ЎҒИТЛАР — таркибида фосфор бўлган минерал ва органик моддалар; ўсимликларнинг фосфор билан озикланишини яхшилаш учун ишлатилади. Ўсимликлар ўзлаштирган фосфорнинг тупрокдаги жамғармасини тўлдиришнинг бирданбир манбаидир. Фосфорли ўғитлар таркибида фосфор бўлган рудалар — апатит ва фосфоритларни қайта ишлаб олинади. Булардан ташқари, металлургия саноати чиқиндилари — томасшлак ва мартен фосфатшлак ҳамда органик моддалар, мас, суяк уни, тунг ва бошқалар Фосфорли ўғитлар сифатида ишлатилади. Қ. х. га етказиб бериладиган Фосфорли ўғитлар таркибидаги фосфор ортофосфат кислота (Н3РО4)нинг ортофосфат тузлари шаклида бўлади. Айрим Фосфорли ўғитлар эса полифосфат (суперфосфат) кислота, шу жумладан, метафосфат кислота асосида олинадиган мураккаб ўғитлардир. Фосфорли ўғитлар саноат йўли билан олинган биринчи минерал ўғитлардан ҳисобланади