Чувалчангнинг танаси кичкина тўгараклар — тарам-тарам бўғимларга бўлинган. Шу сабабли ер чувалчанглари бўғим-бўғим чувалчанглар гуруҳига киради.

Ер чувалчанглари асосан ернинг юмшоқ юқори қатламида ерости йўли қазиб, ана шу йўллар орқали юриб, озиқланади ва ҳаёт кечиради. Улар ҳаракатини енгиллаштирадиган шилимшиқ ажратиб чиқаради. Чувалчанглар икки гуруҳ мушакларини ишга солиб, йўл қазийди.

Мушакларининг бир гуруҳи бутун танаси айланаси бўйлаб ўтган ва ҳар бир бўғимига биттадан мушак тўғри келади. Бўғим мушаклари таранглашган пайти танаси узаяди, чўзилади ва ингичкалашади. Гавдасининг олд қисми олдинга интилади. Иккинчи гуруҳ мушаклар бутун танаси узунаси бўйлаб жойлашган. Бу мушаклар таранглашганда, бўғимлар сиқилади ва танаси кичраяди.