Ko‘chma savdo obektlari toifasiga 100 kvadrat metr maydondan ko‘p bo‘lmagan lotoklar, palatkalar, savdo aravalari, peshtaxtalar, avtodo‘konlar, avtotirkamalar, avtosisternalar, fudtraklar, tonarlar, savdo avtomatlari, mobil konteynerlar, yengil konstruksiyalar va shunga o‘xshash boshqa ko‘chma savdo obektlari kirishi belgilanmoqda.

Ilgari ko‘chma savdo obektlarida faqatgina o‘tirish joylari tashkil etmasdan, donalab sotiladigan taomlarni sotish mumkin bo‘lgan bo‘lsa, endilikda kichik oshxonalar tashkil etishga ruxsat berildi.

Ma’lumot uchun, kichik oshxona — iste’molchilarga oson tayyorlanadigan taomlar, qaynoq va salqin ichimliklar bilan jadal xizmat ko‘rsatishni tashkil etuvchi korxona. Sotiladigan mahsulotlar turiga ko‘ra kichik oshxonalar quyidagilarga ixtisoslashgan bo‘lishi mumkin: kabobxona, palovxona, somsaxona, chuchvaraxona, cheburekxona, pirojkaxona, blinchikxona va shu kabilar. 

Ko‘chma savdo obektlarida quyidagi faoliyatga ruxsat berilmoqda:

• yetishtirilgan qishloq xo‘jaligi mahsulotlarini yengil konstruksiyali ko‘chma muzlatgichlarda saqlash va sotish;
• yengil turdagi transport vositalarini (yengil avtomobil, velosiped, samokat, skuter va boshqalar) ijaraga berish va ta’mirlash xizmatlari;
• elektromobillarni zaryadlash;
• sartaroshlik xizmatlari;
• kosmetolog xizmatlari;
• poyabzal ta’mirlash xizmati;
• maishiy texnika vositalarini ta’mirlash xizmati;
• kalit yasash xizmati.

Quyidagi joylarda ko‘chma savdo obektlarini joylashtirishga yo‘l qo‘yilmaydi: ma’muriy binolarda; jamoat transporti bekatlarida; piyodalar o‘tish joylaridan oldin 15 metrdan kam masofada
 
Ro‘yxatdan o‘tkazilgan ko‘chma savdo obektlarini yoki bir qismini boshqa shaxsga foydalanishga yoki ijaraga berishga o‘rnatilgan taqiq bekor qilinmoqda (foydalanishga yoki ijaraga berish Davlat soliq qo‘mitasi maxsus avtomatlashtirilgan axborot tizimida amalga oshiriladi)