Noutbuk sotib olishda undagi qaysi “ehtiyot qismlar”ga e’tibor berish kerak, degan savol har bir noutbuk sotib oluvchilarni qiynasa kerak. Chunki hozirgi kunda yuzlab, minglab noutbuklarning turlari mavjud, shuningdek, o‘nlab brend ostidagi noutbuklar bozorni egallashga ulgurgan. Birinchi mezon sifatida narxiga qaralsada, baribir ko‘pchilik noutbuk ehtiyot qismlarining sifati va imkoniyatini inobatga olishadi. Quyida sizga noutbukning ehtiyot qismlari haqida qisqacha ma’lumot tayyorladik.

 

Protsessor

 

Ko‘pchilik portativ kompyuterlarga Intel kompaniyasining protsessorlari o‘rnatilgan. Noutbuklar protsessori odatiy kompyuterlar protsessoridan Speed Step texnologiyasi asosida ishlovchi energiya tejamkorligi bilan farqlanadi. Bunday protsessorlar uzoqroq vaqt avtonom tarzda ishlashga xizmat qilish uchun mo‘ljallangan.

 

Biroq elektr ta’minot tizimiga ulangan vaqtida noutbuk protsessori maksimal samaradorlikni ta’minlash uchun to‘liq quvvat bilan ishlashga o‘tadi. Akkumulyator bilan ishlashni boshlashi bilanoq yana yarim quvvatli rejimga o‘tadi.

 

Aksariyat zamonaviy noutbuklar protsessorida yadrolar soni 1, 2 yoki 4tani tashkil etadi. Yadrolar sonining ko‘pligi bir vaqtning o‘zida ko‘plab dasturlardan samarali foydalanish imkonini beradi.

 

Kesh-xotira — o‘ta tezkor operativ xotira bo‘lib, hajmi 1dan 8 Mbaytgacha yetadi. Katta hajmli kesh-xotira multimediyali ilova-dasturlar, o‘yin o‘ynash va videolarni tomosha qilishda ahamiyatga ega.

 

Noutbuklarda bir yadroli (Intel Pentium M, Intel Core Solo, AMD Turion 64) va ko‘p yadroli (Intel Core 2 Duo, Intel Core 2 Quad, Intel Core i7, AMD Turion X2) protsessorlar qo‘llaniladi. Arzon mahsulotlarda esa protsessorlarning “yengillashtirilgan” Intel Celeron M va AMD Mobile Sempron kabi namunalari ishlatiladi. Ular kichik hajmli kesh-xotira, imkoniyati sun’iy cheklangan sistema shinalari bilan ta’minlangani bois samaradorligi ham pastroq bo‘ladi.